ინდონეზიაში ბავშვთა ქორწინება შესაძლოა
აიკრძალოს. ამის შესახებ განცხადება ხელისუფლების წარმომადგენლებმა იმის
შემდეგ გააკეთეს, რაც მოზარდების ქორწინების ფოტოსურათები სოციალურ ქსელებში
გავრცელდა.
ინდონეზია, ყველაზე მჭიდროდ დასახლებული მუსულმანური
სახელმწიფოა მსოფლიოში, რომელიც იმ 10 ქვეყნის სიაშია, სადაც 18 წლამდე
დაქორწინებული გოგონების ყველაზე მაღალი მაჩვენებელია.
15 წლის ბიჭისა და 14 წლის გოგოს ქორწინების
სურათები ქვეყანაში პროტესტის ახალი ტალღის და ადრეული ქორწინების აკრძალვის
მოთხოვნის საბაბი გახდა.
ქალთა გაძლიერების და ბავშვთა დაცვის სამინისტროს
პრეს- მდივანმა განაცხადა, რომ ინდონეზიის პრეზიდენტი ჯოკო ვიდოდო დათანხმდა
ხელი მოაწეროს კანონს ადრეული ქორწინების აკრძალვასთან დაკავშირებით, და
ასევე აღნიშნა, რომ ქვეყანაში ამ საკითხზე საჯარო დებატები
გაიმართება.
სამინისტროში ასევე აცხადებენ, რომ გოგონებისთვის
ქორწინების მინიმალური ასაკი 20 წელი, ხოლო ბიჭებისთვის 22 წელი უნდა
განისაზღვროს.
ინდონეზიის კანონმდებლობის თანახმად, გოგონებს
შეუძლიათ დაქორწინდნენ 16 წლის ასაკში, ხოლო ბიჭებს 19 წლის. გოგონებს ასევე
შეუძლიათ დაქორწინდნენ უფრო პატარა ასაკში და ამის უფლებას რელიგიური სასამართლოები
გასცემენ.