დედაქალაქის მერის მოადგილეების, გამგებლებისა და საქალაქო სამსახურების ხელმძღვანელების მონაწილეობით, გენდერული თანასწორობის საკითხებზე სამუშაო შეხვედრა გაიმართა.
შეხვედრაზე, სახელწოდებით "გენდერული თანასწორობა თბილისის მუნიციპალიტეტში", ამ მიმართულებით არსებული ადგილობრივი და საერთაშორისო ვალდებულებები განიხილეს და მათი შესრულების პროცესში მუნიციპალიტეტის როლზე იმსჯელეს. გარდა ამისა, გაიმართა დისკუსია დისკრიმინაციული მიდგომებისა და ქალთა მიმართ ძალადობის აღმოფხვრის საკითხებზე.
შეხვედრის მონაწილეებმა, ასევე, განიხილეს თბილისის მუნიციპალიტეტის გენდერული თანასწორობის სამოქმედო გეგმის სამუშაო ვერსია, იმსჯელეს არსებულ გამოწვევებზე, შესაძლებლობებსა და დამატებით საჭიროებებზე.
შეხვედრა გაიმართა პროექტის „გენდერული თანასწორობის პოლიტიკის გაძლიერება ადგილობრივი თვითმმართველობის დონეზე“ ფარგლებში, რომელსაც ქალთა საინფორმაციო ცენტრი ახორციელებს გაეროს განვითარების პროგრამისა (UNDP) და შვედეთის მთავრობის ხელშეწყობით, გაეროს ერთობლივი პროექტის „გენდერული თანასწორობისთვის“ ფარგლებში. პროექტის მიზანია ხელი შეუწყოს გენდერული თანასწორობის პოლიტიკის ლოკალიზაციას ადგილობრივ დონეზე.
