ირლანდიაში ორსულობის ხელოვნურად შეწყვეტის შესახებ კანონის ლიბერალიზაციის მიზნით რეფერენდუმი მიმდინარეობს.
ეს არის პირველი ასეთი მცდელობა ბოლო 35 წლის მანძილზე. რეფერენდუმის შედეგები 26 მაისს გახდება ცნობილი, თუმცა გამოკითხვამ აჩვენა, რომ მოსახლეობის უმრავლესობა აბორტის ლეგალიზაციას უჭერს მხარს.
აღსანიშნავია, რომ ირლანდიას აქვს ერთ-ერთი ყველაზე მკაცრი კანონმდებლობა აბორტის გამოყენებასთან დაკავშირებით ევროპაში. 2013 წლამდე ქვეყანაში აბორტი ყველა შემთხვევაში იყო აკრძალული, თუმცა მოგვიანებით მცირედი გამონაკლისი დაუშვეს და ორსულობის შეწყვეტა შესაძლებელი გახდა მსოლოდ იმ შემთხვევაში თუ ნაყოფი საფრთხეს უქმნის დედის ჯანმრთელობას.
რეფერენდუმზე მოქალაქეებს მოუწევთ გადაწყვიტონ, შეინარჩუნონ თუ არა ირლანდიის კონსტიტუციის მე-8 შესწორება, რომელიც კრძალავს აბორტს ან მხარი დაუჭირონ მის გაუქმებას.
2018 წლის იანვარში ირლანდიის პრემიერ-მინისტრმა ლეო ვარადკარმა აღნიშნული ინიციატივით პარლამენტს მიმართა. ვარადკარი, რომელიც ირლანდიის ლგბტ თემის წარმომადგენელი პირველი პრემიერ–მინისტრია, მიიჩნევს, რომ არსებული კანონი აბორტის შესახებ ადამიანის უფლებებთან წინააღმდეგობაში მოდის.
დღეს ქვეყნის კანონმდებლობით, ორსულობის ხელოვნურად შეწყვეტის შემთხვევაში ქალს 14 წლით თავისუფლების აღკვეთა ემუქრება. ამ კანონის გაუქმების მოთხოვნით ირლანდიაში წლებია საპროტესტო აქციები მიმდინარეობს. შეგახსენებთ, რომ მარტში ათობით ათასი დემონსტრანტი გამოვიდა დუბლინის ქუჩებში და მოითხოვა აბორტის ლეგალიზაცია ქვეყანაში. გაეროს ადამიანის უფლებათა კომიტეტმა კანონს აბორტის შესახებ „სასტიკი და არაჰუმანური“ უწოდა.