კატეგორია: გენდერული პოლიტიკა 2018-07-27
საქართველოს პრემიერ-მინისტრმა მამუკა ბახტაძემ შიდა ქართლის, მცხეთა-მთიანეთის, სამეგრელო-ზემო სვანეთის, ქვემო ქართლისა და სამცხე-ჯავახეთის გუბერნატორები თანამდებობიდან გაანთავისუფლა.
„ჩვენ მთლიანად ვცვლით რეგიონალური მართვის სისტემას. გადავდივართ ახალ რეჟიმზე და ახალ სტრუქტურაზე“– განაცხადა პრემიერ–მინისტრმა.
ჯერჯერობით უცნობია ვინ დაიკავებს რწმუნებული– გუბერნატორების თანამდებობებს და დაინიშნება თუ არა ამ პოსტზე ქალი?
შეგახსენებთ, რომ საქართველოში დღემდე გუბერნატორის თანამდებობაზე არც ერთი ქალი არ იყო წარმოდგენილი.
2017 წელს საკონსტიტუციო რეფორმის ჭრილში, კონსტიტუციური პრინციპის დონეზე, სახელმწიფოს მხრიდან განსაკუთრებული ზომების მიღების ვალდებულება იქნა განსაზღვრული, რომელიც აღმოფხვრის ქალებისა და კაცების უთანასწორობას და არსებითი თანასწორობის ხელშემწყოფი იქნება.
ასევე ქალთა მიმართ ყოველგვარი დისკრიმინაციის აღმოფხვრის შესახებ კონვენციის (CEDAW) ფარგლებში შექმნილი კომიტეტის 2014 წლის 18 ივლისის სავალდებულო რეკომენდაციების თანახმად, სერიოზული ნაბიჯებია გადასადგმელი პოლიტიკაში გენდერული თანასწორობის უზრუნველყოფის მიზნით.
|