კატეგორია: ეს საინტერესოა 2018-07-30
გადაცემა „ახალი კვირის“ ეთერში სიუჟეტი: „ქალების „სამეფო“, სადაც ქორწინება არ არსებობს“ გავიდა, რომელიც მიეძღვნა ჩინეთში არსებულ ერთ-ერთ უკანასკნელ მატრიარქატს დედამიწაზე.
ჩინეთში, ჰიმალაის მთებში, ლუგუხუს ტბის პირას გამორჩეული ტრადიციების მქონე მოსოს ხალხი ცხოვრობს, რომლებიც ერთ-ერთ ეთნიკურ უმცირესობას წარმოადგენენ. 40 000-იან ეთნიკურ ჯგუფში მკვეთრად გამოხატული მატრიარქატია. მოსოს ტომის ქალები 16-საუკუნოვან ტრადიციებს დღემდე თითქმის უცვლელად ინარჩუნებენ და ჩინეთის ისტორიაში ერთ-ერთ ყველაზე მშვიდობის მოყვარე ჯგუფად ითვლება.
ცხოვრება ცივილიზაციისგან შორს, კონფლიქტების, ძალადობისა და განქორწინებების გარეშე - ეს ის რეალობაა, რომელიც მოსოს მოსახლეობას დანარჩენ სამყაროსგან განცალკევებულად წარმოაჩენს. დღეს ისინი ტურისტების დიდ ინტერესს იწვევენ, თუმცა მათი ტრადიციების შესახებ ლეგენდები და რეალობა ხშირად ერთმანეთში ირევა.
აქ ყველაზე მთავარი ოჯახში დიდი ბებიაა. დიდი ბებია - სიციალური სტატუსია და მას წინამორბედი დიდი ბებია არჩევს შვილიშვილებიდან, ასაკისა და უნარჩვევების მიხედვით.
მოსოს ხალხში არ არსებობს წყვილების საერთო საკუთრება. ყველა თავისთვის ამუშავებს მიწას. ქალები არიან გადაწყვეტილების მიმღებები და შვილების მეურვეები. ისინი ანაწილებენ ხარჯებს და მუშაობენ დამოუკიდებლად. სოფელში გოგონას დაბადება ნამდვილი დღესასწაულია.
რაც შეეხება ქალისა და კაცის თანაცხოვრებას, პარტნიორს ირჩევენ ქალები. ისინი ყოველთვის ცალ-ცალკე ცხოვრობენ. კაცი ქალთან ღამით მიდის და თუ ქალი თანახმაა დილამდე შეუძლია დარჩენა. ამიტომ არსებობს ტერმინი ‘მოსიარულე ქორწინება’. იმ შემთხვევაში თუ მათ შორის გრძნობა გაქრა, მშვიდობიანად შორდებიან ერთმანეთს და ქალს უკვე შეუძლია სხვა პარტნიორი აირჩიოს.
მატრიარქატი აისახება მათ ვერბალურ კომუნიკაციაშიც. მოსოს ხალხს საკუთარი ენა აქვს სადაც 'მამისა' და 'ქმრის' აღმნიშვნელი სიტყვები საერთოდ არ არის. კაცები ძირითადად მშენებლობაზე და წესრიგის დაცვაზე აგებენ პასუხს, ეხმარებიან ქალებს ბავშვების აღზრდაში.
ჩინეთში მოსოს საზოგადოებას ხშირად „ქალების სამეფოდ“ მოიხსენიებენ.
|