კატეგორია: გენდერული პოლიტიკა 2018-10-03
საქართველოს ეროვნული ბანკი კომერციულ ბანკებს გენდერულ კვოტას უწესებს. ამის შესახებ საქართველოს ეროვნული ბანკის პრეზიდენტის, კობა გვენეტაძის მიერ ხელმოწერილ ბრძანებაშია ნათქვამი, რომელიც 2018 წლის 26 სექტემბერს გაიცა.
ქვეყნის საფინანსო სექტორს ახალი ვალდებულების დაკმაყოფილება მოუწევს - ეს გენდერული კვოტების მოთხოვნაა.
კომერციული ბანკების კორპორატიული მართვის კოდექსის მიხედვით, ბანკის სამეთვალყურეო საბჭოს 20% უნდა შედგებოდეს ქალებისგან. აღნიშნული მოთხოვნის დაკმაყოფილებისთვის ბანკებს ვადა 2019 წლის ბოლომდე მიეცათ.
"ბანკმა უნდა უზრუნველყოს სამეთვალყურეო საბჭოს იმგვარად დაკომპლექტება, რომ დაცული იყოს მოსაზრებათა მრავალფეროვნების ბალანსი. აღნიშნული გულისხმობს საბჭოს განსხვავებული უნარ-ჩვევების, კვალიფიკაციის და გამოცდილების მქონე პირებით დაკომპლექტებას. ამასთან, სამეთვალყურეო საბჭოს მინიმუმ 20% (არანაკლებ 1 წევრი) უნდა შედგებოდეს მდედრობითი სქესის წარმომადგენლებისგან,"- წერია ბრძანების მეხუთე მუხლის მერვე პუნქტში.
2017 წლის დეკემბრის მდგომარეობით, ქართული ბანკების სამეთვალყურეო საბჭოში ქალები 9%-ს, ხოლო დირექტორთა საბჭოში 16 %-ს წარმოადგენენ.
|