კატეგორია: გენდერი მსოფლიოში 
2018-12-05
წელს, მეათეჯერ გამოცხადდა „გენდერული
სამართლიანობის“ ჯილდოს მფლობელები. ჯილდო საერთაშორისო ორგანიზაციამ Women's Link Worldwide–მა დააარსა და ის გადაეცემა იმ სასამართლოს მსოფლიოში, რომელმაც გენდერულ
თანასწორობასთან დაკავშირებული საუკეთესო ან ყველაზე ცუდი გადაწყვეტილება
გამოიტანა.
2018 წელს, ქალთა და გოგონათა უფლებებთან
დაკავშირებული ყველაზე ცუდი გადაწყვეტილების გამოტანის გამო ჯილდო ოთხ სასამართლოს
გადაეცა– ესპანეთის, ელ – სალვადორის, მექსიკის და სუდანის.
სუდანის სასამართლოს „ჯილდო“ მიენიჭა, 19 წლის ნურა
ჰუსეინის საქმეზე განაჩენის გამო. ნურა ჰუსეინი მოძალადე ქმრის მკვლელობაში
დამნაშავედ ცნეს და სასიკვდილო განაჩენი გამოუტანეს. სააპელაციო
სასამართლომ სასიკვდილო განაჩენი გააუქმა და პირველი ინსტანციის განაჩენი
ხუთწლიანი პატიმრობით შეცვალა.
სუდანში, სადაც ფართოდ გავრცელებულია იძულებითი
ქორწინება, გოგონებს ზოგჯერ 10 წლის ასაკში აქორწინებენ. ქორწინების შემდეგ
გაუპატიურება კი არ ისჯება კანონით.
საერთაშორისო ორგანიზაცია Amnesty
International-მა ნურა ჰუსეინის მხარდასაჭერად ონლაინკამპანია #JusticeforNoura
(#სამართლიანობანურასთვის) წამოიწყო, რომელშიც არაერთი ცნობილი ადამიანი იყო
ჩართული.
„ჯილდო“ ესპანეთის სასამართლოსაც გადაეცა. საქმე
ეხებოდა 18 წლის ქალის გაუპატიურებაში ბრალდებული 5 მამაკაცისთვის გამოტანილ
განაჩენს. სასამართლომ მათ სექსუალური ძალადობისთვის 9 წლით თავისუფლების აღკვეთა
მიუსაჯა.
5-მა მამაკაცმა ქალი, პამპლონაში ფესტივალის მიმდინარეობისას
გააუპატიურა და ძალადობის ამსახველი ვიდეო ინტერნეტით გაავრცელა. დანაშაულს
ესპანეთში დიდი რეზონანსი მოჰყვა. ესპანეთის დიდ ქალაქებში მრავალრიცხოვანი
საპროტესტო აქციებიც გაიმართა. დემონსტრანტები ბრალდებული მოძალადეების
განაჩენის ავტორი მოსამართლეების გადაყენებას ითხოვდნენ და მიიჩნევდნენ, რომ
სასამართლო მათ მიმართ უფრო მკაცრი უნდა ყოფილიყო.
ელ-სალვადორის სასამართლო, ასევე შევიდა იმ
სასამართლოების სიაში, სადაც ქალთა და გოგონათა უფლებებთან დაკავშირებული ყველაზე
ცუდი გადაწყვეტილებიბი არის მიღებული. ელ-სალვადორში აბორტი ნებისმიერ შემთხვევაში
აკრძალულია, თუნდაც ქალი გაუპატიურების დროს დაორსულდეს და ეს ოპერაცია 30
წლით თავისუფლების აღკვეთით ისჯება.
„გენდერული სამართლიანობის“ ჯილდოს
მფლობელები წელს ესპანეთის, კენიის და არგენტინის ექსპერტებმა აირჩიეს.
|
