კატეგორია: გენდერული პოლიტიკა 2019-04-09
ინდოეთის მმართველმა პარტიამ „ბხარატია ჯანატამ“ (Bharatiya Janata Party) პირობა დადო, რომ საპარლამენტო არჩვნებში გამარჯვების შემთხვევაში, ქვეყნის ორპალატიან პარლამენტში ქალებისთვის 33%-ან კვოტას დააწესებს.
"მთავრობის ყველა დონეზე ქალთა კეთილდღეობას და განვითარებას მიენიჭება პრიორიტეტი და მმართველი პარტია საკონსტიტუციო ცვლილების გზით პარლამენტში შემოიღებს ქალებისთვის 33% კვოტას", - ნათქვამია პარტიის განცხადებაში.
ინდოეთის ოპოზიციური პარტიის „ინდოეთის ეროვნული კონგრესის“ თავმჯდომარემ, რაჰულ განდიმ ასევე განაცხადა, რომ არჩევნებში გამარჯვების შემთხვევაში, მისი პარტია შემოიღებს ქალებისთვის 30% კვოტას.
ქვეყანაში საპარლამენტო არჩევნები 11 აპრილს გაიმართება და შვიდ ეტაპად ჩატარდება.
ინდოეთის პარლამენტი — ინდოეთის უმაღლესი ფედერალური საკანონმდებლო ორგანოა. ის შედგება პრეზიდენტისა და ორი პალატისაგან: ქვედა პალატა - ლოკ-საბჰა (სახალხო პალატა) და ზედა პალატა - რაჯია-საბჰა (შტატების საბჭო). ლოკ-საბჰა შედგება 552, ხოლო რაჯია-საბჰა 250 დეპუტატისაგან.
ნებისმიერ პარტიას ან კოალიციას, სულ ცოტა 272 მანდატი სჭირდება ახალი მთავრობის შექმნისთვის.
მიუხედავად იმისა, რომ ქალები ქვეყნის მოსახლეობის თითქმის ნახევარს წარმოადგენენ, მათი წარმომადგენლობა ლოკ-საბჰაში 11.6%, ხოლო რაჯია-საბჰაში 11% შეადგენს.
2010 წელს კანონპროექტი ქალებისთვის კვოტის შემოღების შესახებ ინდოეთის პარლამენტის ზედა პალატას გადაეცა, მაგრამ მას შემდეგ მისი განხილვა შეჩერებულია. ბოლო არჩევნებში კი 8,251 კანდიდატიდან მხოლოდ 668 ქალი იყო.
ამჯერად, მოსალოდნელია, რომ ინდოეთში არჩევნებში მონაწილეობას 900 მილიონზე მეტი ადამიანი მიიღებს.
|