კატეგორია: გენდერული პოლიტიკა 
2019-05-31
ავსტრიის პრეზიდენტმა ალექსანდრ ვან დერ ბელენმა საკონსტიტუციო სასამართლოს თავმჯდომარე, ბრიგიტე ბირლაინი ქვეყნის კანცლერად დანიშნა. ბირლაინი პირველი ქალია, რომელიც ამ პოსტს დაიკავებს.
69 წლის ბრიგიტე ბირლაინი 2019 წლის სექტემბრის ვადამდელ საპარლამენტო არჩევნებამდე გარდამავალ მთავრობას უხელმძღვანელებს.
ბრიგიტე ბირლაინი დაიბადა 1949 წლის 25 ივნისს ვენაში და დაამთავრა ვენის უნივერსიტეტის იურიდიული ფაკულტეტი. 2003 წლის იანვარში ის გახდა პირველი ქალი ავსტრიის საკონსტიტუციო სასამართლოს თავმჯდომარის მოადგილე და 15 წლის შემდეგ ამ სასამართლოს თავმჯდომარე.
მისი წინამორბედი სებასტიან კურცი და მისი მთავრობა პარლამენტმა გადააყენა. მთავრობის გადაყენების გადაწყვეტილება ავსტრიის პარლამენტმა ე.წ. იბიცას სკანდალის შემდეგ მიიღო.
ავსტრიის სახალხო პარტიის კონსერვატი ლიდერი, სებასტიან კურცი 32 წლისაა და სახელმწიფოს ყველაზე ახალგაზრდა ლიდერად მიიჩნევა მსოფლიოში. იგი პირველი კანცლერია მეორე მსოფლიო ომის შემდეგ ავსტრიაში, რომელსაც უნდობლობა გამოუცხადეს.
კენჭისყრისას, სოციალ-დემოკრატების ინიციატივას, უნდობლობის გამოცხადებაზე, მხარი დაუჭირა კურცის ყოფილმა კოალიციურმა პარტნიორმა, ულტრა მემარჯვენე თავისუფლების პარტიამ.
|
