ინდოეთში, ბიჰარის შტატში, შვიდი მამაკაცი, მათ შორის ადგილობრივი ხელისუფლების წარმომადგენელი, შეიჭრა ერთ-ერთი მაცხოვრებლის სახლში და მისი ქალიშვილის გაუპატიურება სცადა.
"როდესაც დედამ და ქალიშვილმა წინააღმდეგობა გაუწიეს, კაცები გაბრაზდნენ და ადგილობრივ პარიკმახერს უბრძანეს თავები გადაეპარსა მათთვის", - განაცხადა ერთ-ერთმა პოლიციელმა Thomson Reuters Foundation-ის მიცემულ ინტერვიუში. მისივე თქმით, კაცებმა ქალებს ჯოხებით სცემეს, შემდეგ კი სოფელში ჩამოატარეს.
"ჩვენ ორი ადამიანი დავაკავეთ, ხუთი კი ძებნაშია გამოცხადებული," - განაცხადა მან და დასძინა, რომ საქმე სისხლის სამართლის მუხლით არის აღძრული.
მთავრობის მონაცემებით, 2016 წელს ინდოეთში დაახლოებით 40,000 გაუპატიურების შემთხვევაა დარეგისტრირებული ანუ საშუალოდ დაახლოებით 100 შემთხვევა დღეში.
ბიჰარში მომხდარი ინციდენტი არ არის ერთადერთი, რომელიც ამ ბოლო პერიოდში მოხდა. ივნისის ბოლოს, შტატში მოკლეს ორი ქალი, რომლებმაც მოძალადეს წინააღმდეგობა გაუწიეს და არ მისცეს მას საშუალება გოგონა შეევიწროებინა.
აპრილში კი ბიჰარში კაცმა გოგონას მჟავა გადაასხა, იმის შემდეგ, რაც მან წინააღმდეგობა გაუწია და არ მისცა საშუალება გაეუპატიურებინა.