კატეგორია: გენდერი მსოფლიოში 
2019-07-24
შვედი ეკო-აქტივისტი, 16 წლის გრეტა ტუნბერგი, სიტყვით საფრანგეთის ეროვნულ ასამბლეაში გამოვიდა. ტუნბერგი პარიზში მოძრაობა "გარემოს გარდაქმნის" 162-ი დეპუტატის მოწვევით ჩავიდა. ახალგაზრდა გარემოსდამცველთან ერთად, ეროვნულ ასამბლეაში სიტყვით ახალგაზრდა ფრანგი ეკო-აქტივისტები გამოვიდნენ, რომლებიც მოძრაობა Youth for Climate წარმოადგენენ.
ტუნბერგის ერთ-ერთმა მთავარმა ოპონენტმა, პარტია „რესპუბლიკელების“ წარმომადგენელმა, გიომ ლარივემ კოლეგებს ამ სხდომის ბოიკოტისკენ მოუწოდა.
"გლობალურ დათბობასთან ბრძოლაში ჩვენ არ გვჭირდება აპოკალიფსის გურუები, არამედ მეცნიერული პროგრესი და პოლიტიკური გამბედაობა", - განაცხადა მან შაბათს.
გრეტა ტუნბერგის კიდევ ერთმა კრიტიკოსმა, დეპუტატმა ჯულიენ ობერმა, გოგონას "წინასწარმეტყველი მოკლე შარვალში" უწოდა.
თავის გამოსვლაში გრეტა ტუნბერგმა განაცხადა, რომ ზოგიერთ ფრანგ დეპუტატს შეუძლია დააიგნოროს მისი და სხვა ახალგაზრდების გაფრთხილებები გლობალური დათბობის შესახებ, თუმცა სთხოვა, რომ მეცნიერებისთვის მოესმინათ.
"ზოგიერთმა ადამიანმა გადაწყვიტა არ მოსულიყო და არ მოესმინა ჩვენთვის, რადგან ჩვენ უბრალოდ ახალგაზრდები ვართ. მაგრამ თქვენ უნდა მოუსმინოთ მეცნიერებს, ეს ყველაფერია, რასაც ჩვენ ვითხოვთ ", - თქვა ტუნბერგმა.
გასულ ზაფხულს სტოკჰოლმის პარლამენტის წინ გრეტა ტუნბერგმა აქცია გამართა. ის აცხადებდა, რომ სკოლაში არ ივლის მანამ, სანამ შვედეთი არ შეასრულებს პარიზის ხელშეკრულების პირობებს, რომელიც სათბურ აირებს ეხება.
ტუნბერგის აქციის შემდეგ, ევროპის მასშტაბით რამდენიმე ათასი მოსწავლე გამოვიდა ქუჩაში, რათა კლიმატის ცვლილების საკითხებისთვის ყურადღება მიეპყრო. გოგონა სტუმრის სტატუსით მიწვეული იყო გაეროს კლიმატის კონფერენციასა და დავოსის მსოფლიო ეკონომიკურ ფორუმზეც.
2019 წლის აპრილში ჟურნალ TIME- ის მიხედვით ტუნბერგი მსოფლიოს 100 ყველაზე გავლენიან ადამიანს შორის დასახელდა.
გლობალური დათბობის წინააღმდეგ ბრძოლაში შეტანილი წვლილისთვის, შვედმა და ნორვეგიელმა პოლიტიკოსებმა 16 წლის ტურნბერგი ნობელის მშვიდობის პრემიაზე წარადგინეს.
|
