კატეგორია: გენდერული ძალადობა 
2019-08-14
ოპერის ესპანელი მომღერალი პლასიდო დომინგო რამდენიმე ქალმა სექსუალურ შევიწროებაში დაადანაშაულა.
შვიდი მომღერალისა და ერთი მოცეკვავის განცხადებების მიხედვით, მომღერალი სხვადასხვა ქალებს 1980-იანი წლებიდან 30 წლის განმავლობაში ავიწროებდა.
მხოლოდ ერთმა ქალმა, მეცო-სოპრანომ პატრიცია ვულფმა, გადაწყვიტა თავისი სახელის დასახელება.
"ბიზნეს-ლანჩი ჩვეულებრივი რამაა, თუმცა უჩვეულოა, როცა ამ შეხვედრაზე ვიღაც მუხლზე ან ხელზე ხელს გკიდებს. ის ყოველთვის ცდილობდა რამე გზით შეხებოდა ან ეკოცნა ადამიანებისთვის", — ამბობს მომღერალი ქალი.
პლასიდო დომინგო ტოპ-პოზიციებზე სხვადასხვა ოპერაში მუშაობდა და სავარაუდო შევიწროებებიც იმ ადგილებში ხდებოდა, სადაც ღონისძიებები იმართებოდა.
ამის გარდა, ექვსი ქალი ამბობს, რომ დომინგომ სექსუალური წინადადებებით მათ დისკომფორტი აგრძნობინა.
ოპერის ბიზნესში მომუშავე უამრავი ადამიანი ადასტურებს, რომ ხშირად შეესწრნენ ახალგაზრდა ქალების მიმართ მრავალი გრემის ჯილდოს მფლობელისგან მიუღებელ სექსუალურ ქმედებებს. AP-ის მიხედვით, დომინგოს ქმედებები საოპერო სამყაროში "ღია საიდუმლო" იყო.
78 წლის მომღერალმა გამოცემის კითხვებს არ უპასუხა, თუმცა განცხადება გაავრცელა:
"უცნობი ადამიანებისგან გავრცელებული ხმები და ბრალდებები, რომელთაგან ზოგი 30 წლის წინანდელია, საკმაოდ შემაწუხებელი და არაზუსტია.
თუმცა, ჩემთვის ასევე მტკივნეულია, რომ ვინმე გავაბრაზე და თავი არაკომფორტულად ვაგრძნობინე, იმის მიუხედავად რამდენი ხნის წინ იყო ის და რა იყო ჩემი მიზნები. მე მჯეროდა, რომ ჩემი ურთიერთობები და დამოკიდებულებები ყოველთვის მისაღები და ორმხრივად სასურველი იყო. ადამიანებმა, რომლებიც მიცნობენ ან ჩემთან მუშაობდნენ, იციან, რომ მე ის ადამიანი არ ვარ, ვინც სხვას გამიზნულად დააზარალებს, შეავიწროებს ან შეარცხვენს".
მბრალდებელი ქალებიდან ერთი ამბობს, რომ დომინგომ მას კაბაში ხელი ჩაუყო, სამი კი ამბობს, რომ მომღერალმა მათ ძალით აკოცა ქალების გასახდელში, სასტუმროს ოთახში და ბიზნეს-ლანჩის შეხვედრაზე.
შვიდი ქალი ამბობს, რომ დომინგოს მხრიდან სექსუალურ შეთავაზებებზე უარის თქმამ მათ კარიერაზე უარყოფითი გავლენა მოახდინა, ზოგი კი ამბობს, რომ შერჩეულ როლებზე აღარ მიუღიათ.
მბრალდებლებიდან მხოლოდ ერთმა ქალმა, მეცო-სოპრანო პატრიცია ვულფმა ისურვა საკუთარი სახელით საუბარი. სხვებმა კი ანონიმურად დარჩენა ისურვეს, რომ მათ გამჟღავნებულ ხმებს კარიერაზე უარყოფითად არ ემოქმედა. ქალები მსგავს ისტორიებს ყვებიან — რომ, მომღერალი მათ შუაღამისას ურეკავდა და "კარიერასთან დაკავშირებული" რჩევის მისაცემად სასწრაფო შეხვედრას სთხოვდა.
ქალები ამბობენ, რომ მათ დომინგოს სავარაუდო ქმედებებზე ხმამაღლა სასაუბროდ ძალა #MeToo კამპანიამ შემატა.
თავად მომღერალი დასძენს, რომ მისთვის გასაგებია, რომ ის წესები და სტანდარტები, რომლებიც ახლა არსებობს, წარსულისგან განსხვავდება.
|
