კატეგორია: გენდერული ძალადობა 
2019-10-11
ქალი, რომელიც, სავარაუდოდ, ყოფილმა ქმარმა დაჭრა, კლინიკაში გარდაიცვალა. ინფორმაცია პირველ არხს ხაშურის რეფერალურ ჰოსპიტალში დაადასტურეს.
სასწრაფო სამედიცინო დახმარების ინფორმაციით, ქალი საავადმყოფოში მძიმე დაზიანებებით შეიყვანეს. კლინიკის მენეჯერი თეიმურაზ მძინარაშვილი ამბობს, რომ დაზიანებები სიცოცხლისთვის შეუთავსებელი იყო.
"პაციენტი შემოიყვანეს უგონო მდგომარეობაში. ის გადაყვანილი იყო მართვით სუნთქვაზე, უტარდებოდა სათანადო რეანიმაციული ღონისძიებები. პაციენტის გადარჩენა ვერ მოხერხდა. სავარაუდოდ, ეს არ იყო ცეცხლნასროლი დაზიანება. იყო მრავლობითი ტრავმა ქალას ძვლებისა და იყო ტვინის ტრავმა. იყო სისხლჩაქცევები თავის ტვინში", — განაცხადა მან.
მედიაში გავრცელებული ინფორმაციით, შემთხვევის ადგილას ნაპოვნია ხელყუმბარაც. საქმეზე გამოძიება სისხლის სამართლის კოდექსის 19-108 მუხლით დაიწყო. ამ მუხლით სისხლის სამართლის კოდექსით პასუხისმგებლობა განზრახ მკვლელობის მცდელობისთვის დგება.
|
