კატეგორია: პრესკლიპინგი 
2009-02-16
ჯანდაცვის სისტემაში მომხდარი ცვლილებები შეეხო სამშობიარო სახლებსაც.
2009 წლის პირველ იანვრამდე აღრიცხვაზე მყოფ ორსულებს სახელმწიფო აძლევდა უფასო მშობიარობის ბარათს, ეს იმას ნიშნავდა, რომ უხდიდა ორას ლარს. სიღარიბის ზღვარს ქვემოთ მყოფ მოქალაქეებსა და პედაგოგებს, რომლებიც დაზღვეულნი არიან სხვადასხვა სადაზღვეო კომპანიებში სრულად უფინანსდებოდათ მომსახურება. მიმდინარე წლის დასაწყისიდან კი ნებისმიერმა მშობიარემ თვითონ უნდა გადაიხადოს ფიზიოლოგიური მშობიარიბისას 350, ხოლო საკეისრო კვეთის შემთხვევაში 800 ლარი. (ეს არ ეხებათ პედაგოგებს, სიღარიბის ზღვარს ქვემოთ მყოფ მოსახლეობას, იმ მოქალაქეებს, რომლებიც ფლობენ სამედიცინო მომსახურების პოლისს) სხვადასხვა სახის ოპერაციები, მაგალითად როგორიცაა საკვერცხის კისტა ან კეთილთვისებიანი სიმსივნე ღირს 950 ლარი (გადახდილ თანხაში შედის როგორც მედ პერსონალთა მომსახურება, ასევე მედიკამენტები). სახელმწიფოს მიერ ფინანსდება ოთხი ვიზიტი ცხრა თვის განმავლობაში ქალთა კონსულტაციაში.
აღნიშნულ ცვლილებებზე ოზურგეთის სამშობიარო სახლის ხელმძღვანელი დავით მდინარაძე გვესაუბრა: ,,ჩვენი რაიონის მოსახლეობის დიდი ნაწილი გადახდის უუნაროა და რადგან მშობიარობა უფრო დიდ ხარჯებთანაა დაკავშირებული ვიდრე აქამდე იყო, შეიძლება შობადობამ იკლოს. დასახელებული თანხები მოქალაქეებისათვის ცოტა ნამდვილად არ არის, ამის გამო ალბათ გვექნება ბინაზე მშობიარობის ფაქტები, რამაც შეიძლება ცუდ შედეგამდე მიგვიყვანოს,საფრთხე შეექმნება ახლშობილის და დედის ჯანმრთელობას რადგან ჩვენ ვეღარ შევძლებთ კონტროლს".
იმედია ჯანდაცვის სისტემაში მომხდარი ცვლილებები ცუდად არ აისახება ისეთ უმნიშვნელოვანეს დაწესებულებებზე როგორიცაა სამშობიარო სახლები და შობადობა კი არ შემცირდება გაიზრდება კიდეც.
source
|
 |
