კატეგორია: ტრეფიკინგი 
2009-03-04
თბილისში ჩატარდა სამუშაო შეხვედრა, რომელიც მიზნად ისახავდა ინფორმაციის გაზიარებას უკრაინის, სამხრეთ კავკასიისა და ცენტრალური აზიის ქვეყნებში შრომითი მიგრაციის შესახებ.
შეხვედრაში მონაწილეობდა ,,ადამიანის ჰარმონიული განვითარების ხელშემწყობი საზოგადოება“ (საქართველო), ,,ქალთა კვლევებისა და რესურსების ესტონური ცენტრი“, ,,აზერბაიჯანის ახალგაზრდა იურისტთა კავშირი, ,,იმედი და დახმარება“ (სომხეთი).
შეხვედრის მონაწილეებმა იმსჯელეს არარეგალური მიგრაციის პრობლემის კომპლექსურობაზე, რომელიც მოიცავს სოციალურ, ეკონომიკურ და სამართლებრივ ასპექტებს და უკავშირდება ადამიანის უფლებათა სერიოზულ დარღვევას, მათ შორის ისეთ კრიმინალურ ასპექტებს, როგორიცაა ადამიანით ვაჭრობა (ტრეფიკინგი), იძულებითი შრომა, ექსპლუატაცია, ადამიანებით კონტრაბანდული ვაჭრობა.
გაიხსენეს საქართველოს ახლო წარსულში მომხდარი სამწუხარო მაგალითები, კერძოდ, შემთხვევა, როდესაც 2006 წელს საქართველოდან მიგრანტები გამოყენებულ იქნენ როგორც ქვეყანაზე ზემოქმედების იარაღი და მოხდა მათი დეპორტაცია ადამიანის უფლებების უხეში დარღვევით.
მსჯელობა შეეხო საერთაშორისო საკანონმდებლო მექანიზმებს, რომლის შემწეობითაც დაუშვებელი იქნება მიგრანტების პოლიტიკურ იარაღად გამოყენება მათი წარმოშობის ქვეყანაზე ზეწოლის მიზნით.
აღინიშნა, რომ მიგრანტებისა და მათი ოჯახების უფლებების დაცვის შესახებ კონვენციის ხელმოწერა და რატიფიცირება ხელს შეუწყობს ამ პრობლემის ცივილიზებულ მაგვარებას. საქართველოს მთავრობა საჭიროა ატარებდეს გააზრებულ ღონისძიებებს, რათა მოხდეს საზღვარგარეთ მცხოვრები მოსახლეობის აქტიური ნაწილის ქვეყანაში დაბრუნება და მათთვის შესაძლებლობის მიცემა, სამშობლოში მოახდინონ საკუთარი თავის რეალიზება.
შეხვედრა გაიმართა ევროპის საბჭოს, ფონდ ,,ღია საზოგადოება – საქართველო“–სა და ,,ღია საზოგადოების ინსტიტუტის“ პროგრამის ,,აღმოსავლეთ–დასავლეთი: თანამშრომლობა საზღვრების გარეშე“, მხარდაჭერით.
წყარო: პორტალი ginsc
|
 |
