ამა წლის 3 ივნისს, ჩვენთვის ცნობილი გახდა ეთნიკური დისკრიმინაციის შემცველი ფაქტის შესახებ. რამდენიმე დღის წინ მოქალაქე ე. მ. დაუკავშირდა კომპანია „დიზაინ ლაბორატორიას“ ავეჯის შეკვეთის მიზნით. ამ დღეების განმავლობაში ქალბატონი ე. ინტერესი კომპანიის ფეისბუქ გვერდის მიმართ გაიზარდა, აინტერესებდა რა კომპანია რა სახის სოციალურ აქტივობებს ახორციელებს კომპანია და კომუნიკაციას აწარმოებს კლიენტებთან და დაინტერესებულ პირებთან. კომპანიის ფეისბუქ გვერდის ერთ-ერთ პოსტში, ქალბატონმა ე. გამოთქვა მოსაზრება, რის საპასუხოდაც, კომპანიის ადმინისტრატორმა პირადი მიმოწერა დაიწყო მასთან, რომელსაც დისკრიმინაციული ხასიათი ჰქონდა, მათ შორის მოიცავდა იმასაც, რომ კომპანია „სომხებს არაფერს უკეთებს“.
გვინდა ხაზგასმით აღვნიშნოთ, რომ საქართველოს მოქალაქეთა თანასწორობა და დისკრიმინაციის დაუშვებლობა გარანტირებულია საქართველოს კონსტიტუციით, კერძოდ, მისი მე-14 მუხლიდან გამომდინარე ყველა ადამიანი თანასწორია კანონის წინაშე, განუჩევლად რასისა, კანის ფერისა, ენისა, სქესისა, რელიგიისა, პოლიტიკური და სხვა შეხედულებებისა, ეროვნული, ეთნიკური და სოციალური კუთვნილებისა, წარმოშობისა, ქონებრივი და წოდებრივი მდგომარეობისა, საცხოვრებელი ადგილისა.
2014 წლის2 მაისს მიღებული „საქართველოს კანონი დისკრიმინაციის ყველა ფორმის აღმოფხვრის შესახებ“ კრძალავს ყველა სახის დისკრიმინაციას საქართველოში. მისი მიზანია დისკრიმინაციის ყველა ფორმის აღმოფხვრა და კანონმდებლობით დადგენილი უფლებების თანასწორ დონეზე უზრუნველყოფა ნებისმიერი ფიზიკური თუ იურიდიული პირისათვის. აღნიშნულ შემთხვევაში ადგილი კი, კანონით გათვალისწინებულ „პირდაპირი“ სახის დისკრიმინაციას წარმოადგენს, ვინაიდან ნათელია, რომ ეროვნული წარმოშობის გამო ხდება კერძო კომპანიის მიერ კლიენტის დისკრიმინაცია.
ჩვენ მნიშვნელოვნად მიგვაჩნია, შეიქმნას დისკრიმინაციის მსხვერპლთა დაცვის საქართველოს კანონმდებლობის გამოყენების პრეცედენტები, რამაც ხელი უნდა შეუწყოს, როგორც დისკრიმინაციის მსხვერპლთა უფლებების აღდგენას, ასევე პრევენციას მსგავსი ტიპის ფაქტების თავიდან აცილების მიზნით. შესაბამისად:
ხელმომწერი არასამთავრობო ორგანიზაციები საქართველოს სახალხო დამცველს მოვუწოდებთ დაიწყოს აღნიშნულიფაქტის შესწავლა და საჭიროების შემთხვევაში გამოსცეს რეკომენდაცია, მიმართოს სასამართლოს და განახორციელოს ყველა საჭირო ქმედება მინიჭებული უფლებამოსილებიდან გამომდინარე.
მოვუწოდებთ თავად დაზარალებულსაც, რომ სამოქალაქო საპროცესო კოდექსით გათვალისწიებული პროცედურების დაცვით თავადაც მიმართოს სასამართლოს და დისკრიმინაციის ფაქტის გამო მოითხოვოს მორალური და/ან მატერიალური ზიანი ანაზღაურება.
დეტალური ინფორმაცია დაზარალებული პირის შესახებ გადაეგზავნება სახალხო დამცველს და სხვა შესაბამის უწყებებს.
Using materials of the site the reference on GINSC with the indication of the author is obligatory The Portal GINSC is supported by the Kvinna til Kvinna Foundation
