საპარლამენტო უმრავლესობის წევრი თამარ კორძაია სოფელ მოხეში მომხდარი ინციდენტის გამო საქართველოს მუსლიმ მოსახლეობას ბოდიშს უხდის. კორძაია რელიგიათა სააგენტოს მიმართავს, უმოკლეს ვადაში შეისწავლოს საკითხი. მისივე განცხადებით, ყველა პოლიციელმა, რომელმაც ძალას გადაამეტა პასუხი უნდა აგოს.
მოხეს ინციდენტს თამარ კორძაია დღეს ჟურნალისტებთან საუბრისას გამოეხმაურა.
"ვთვლი, რომ რელიგიათა სააგენტომ აქტიურად უნდა იმუშაოს. მოხეს მუსლიმ მოსახლეობას აქვს პრეტენზია, რომ შენობა იყო მუსლიმური მეჩეთი და ითხოვენ მის დაბრუნებას. რელიგიათა სააგენტო შეიქმნა სწორედ იმიტომ, რომ ასეთი ტიპის საკითხებზე იმსჯელოს და კონფლიქტები აღმოფხვრას", - განაცხადა ჟურნალისტებთან საუბრისას თამარ კორძაიამ.
რაც შეეხება პოლიციელთა პასუხისმგებლობის საკითხს, როგორც კორძაიამ აღნიშნა, გუშინ მედიით მისთვის ცნობილი გახდა, რომ ერთ-ერთი მოხუცი ქალბატონი ამტკიცებს, რომ პოლიციელმა სცემა და თუკი ეს ფაქტი დასტურდება, პოლიციელმა სათანადოდ უნდა აგოს პასუხი.
გუშინ სოფელ მოხეში დაპირისპირება მოხდა. ადგილობრივი მუსლიმი მოსახლეობა იმ შენობის დემონტაჟს აპროტესტებდა, რომელშიც, მათი თქმით, მეჩეთი იყო. თუმცა, სამცხე-ჯავახეთის მხარეში სახელმწიფო რწმუნებული აცხადებს, რომ სოფელ მოხეში მდებარე შენობაში მეჩეთი არასდროს ყოფილა და იქ ბიბლიოთეკა გაკეთდება.
სამართალდამცველებსა და მოხეს მოსახლეობას შორის დაპირისპირებისას 14 ადამიანი დააკავეს. ისინი პოლიციის შენობაში არიან გადაყვანილი.
