„რელიგიის საკითხთა სახელმწიფო სააგენტო ხელს აფარებს იმ პირებს, ვინც რელიგიური უმცირესობების მიმართ შეუწყნარებლობას იჩენს, მის მიერ ამა თუ იმ სადავო საკითხის შესწავლის უსასრულოდ გაჭიანურება კი ამგვარი დავებისა და კონფლიქტების მოუგვარებლობას უწყობს ხელს“, - „საქართველოს დემოკრატიულმა ინიციატივამ“ საქართველოში ადამიანის უფლებათა და თავისუფლებათა მდგომარეობასთან დაკავშირებით 2014 წლის მეორე ნახევრის ანგარიში გამოაქვეყნა.
„ჯერჯერობით არ იკვეთება ერთი წლის წინ საქართველოს მთავრობის მიერ სწორედ რელიგიის თავისუფლების კუთხით არსებული პრობლემების აღმოფხვრის მიზნით შექმნილი რელიგიის საკითხთა სახელმწიფო სააგენტოს ქმედითი და ეფექტური მონაწილეობა მსგავსი კონფლიქტების მოსაგვარებლად. არსებობის ერთი წლის თავზე კიდევ უფრო გამყარდა საფუძვლიანი ვარაუდი, ერთი მხრივ, რელიგიის საკითხთა სახელმწიფო სააგენტოს უფუნქციობის, ხოლო მეორე მხრივ, მის მიერ უპირატესად დომინანტი რელიგიური მიმდინარეობის ინტერესების გატარების თაობაზე“, - ნათქვამია ანგარიშში.
„საქართველოს დემოკრატიული ინიციატივის“ კვლევის მიხედვით, 2014 წლის მეორე ნახევარში რელიგიური ნიშნით დისკრიმინაციის რამდენიმე შემთხვევა დაფიქსირდა, რაც, მათი თქმით, სახელმწიფოს მხრიდან უფლებების დარღვევის ფაქტებზე არაადეკვატური რეაგირების ფონზე რელიგიური შეუწყნარებლობის გამძაფრებას ცხადყოფს.
„ბოლო ორი წლის განმავლობაში გამოვლენილი რელიგიური შეუწყნარებლობის ფაქტები აშკარად მიუთითებს რელიგიის თავისუფლების კუთხით სახელმწიფოს მხრიდან არაეფექტურ პოლიტიკაზე. სხვადასხვა რელიგიური კონფესიის წარმომადგენლების, განსაკუთრებით მუსლიმთა, მიმართ რელიგიური დევნისა და დისკრიმინაციის ფაქტები ცხადყოფს, რომ სახელმწიფოს მხრიდან არ ხდება პრობლემებზე დროული რეაგირება და მეტიც, ხშირ შემთხვევაში თავად ხელისუფლების წარმომადგენლების ქმედება ხდება კონფლიქტის ესკალაციის და შეუწყნარებლობის წამახალისებელი ფაქტორი“, - ნათქვამია ანგარიშში.
Using materials of the site the reference on GINSC with the indication of the author is obligatory The Portal GINSC is supported by the Kvinna til Kvinna Foundation
