კატეგორია: განცხადებები 2017-03-13
საქართველო, თბილისი. 14 მარტი, 11:00 საათი. სასტუმრო ”ამბასადორი” (თბილისი, იოანე შავთელის #17). ქალთა საინფორმაციო ცენტრის ორგანიზებით, გაიმართება შეხვედრა.
შეხვედრა მიზნად ისახავს თბილისის მუნიციპალიტეტის გენდერული თანასწორობის ინსტიტუციური მექანიზმის - საკრებულოსთან არსებული გენდერული თანასწორობის საბჭოს და თბილისის მუნიციპალიტეტის გენდერული თანასწორობის სტრატეგიის პრეზენტაციას. შეხვედრაზე ასევე განხილული იქნება თბილისის მუნიციპალიტეტის სამოქმედო გეგმის სამუშაო ვერსია, რომელიც უახლოეს მომავალში დასამტიკცებლად იქნება წარდგენილი თბილისის მუნიციპალიტეტის საკრებულოში.
მუნიციპალიტეტის გადაწყვეტილების მიმღები პირების, საერთაშორისო და ადგილობრივი ორგანიზაციების წარმომადგენლების მიერ შეხვედრაზე გამოთქმული რეკომენდაციები და მოსაზრებები აისახება თბილისის მუნიციპალიტეტის გენდერული თანასწორობის სამოქმედო გეგმის საბოლოო დოკუმენტში.
შეხვედრას დაესწრებიან პარლამენტთან არსებული გენდერული თანასწორობის საბჭოს თავმჯდომარე, თბილისის მერი და საკრებულოს თავმჯდომარე, ასევე მუნიციპალიტეტის რაიონული გამგებლები და გამგეობებში გენდერული თანასწორობის საკითხებზე პასუხისმგებელი პირები. ასევე ადგილობრივი არასამთავრობო ორგანიზაციებისა და საერთაშორისო ორგანიზაციების წარმომადგენელი პირები.
აღსანიშნავია, რომ თბილისის მუნიციპალიტეტის საკრებულომ გენდერული თანასწორობის საბჭო 2016 წლის ნოემბერში ჩამოაყალიბა, ხოლო თბილისის მუნიციპალიტეტის გენდერული თანასწორობის სტრატეგია 2017 წლის 3 თებერვალს დაამტკიცა. ღონისძიება ორგანიზებულია ქალთა საინფორმაციო ცენტრის მიერ. ღონისძიება ტარდება გაეროს განვითარების პროგრამის (UNDP) და შვედეთის მთავრობის ხელშეწყობით, გაეროს ერთობლივი პროექტის „გენდერული თანასწორობისთვის“ ფარგლებში.
პროექტი „თბილისის მუნიციპალიტეტის გენდერული პოლიტიკის გაძლიერება.“ |