Category: Gender policy 
2018-03-22
21 მარტს, პარლამენტში, პლენარულ სხდომაზე პირველი მოსმენით განიხილებოდა საკანონმდებლო ინიციატივა სავალდებულო გენდერული კვოტირების შესახებ.
კანონპროექტის განხილვის დროს სიტყვით დეპუტატი დიმიტრი ცქიტიშვილი გამოვიდა.
მან სრული მხარდაჭერა გამოუცხადა სავალდებულო გენდერული კვოტირების შემოღებას საქართველოში და მოუწოდა პარლამენტარებს კანონპროექტის მხარდაჭერისკენ.
„გენდერული კვოტირების მიღება არის პარლამენტის ისტორიული მისია და ჩვენი ღირსების გადაწყვეტილება“– დაწერა მან თავის facebook გვერდზე.
„ბუნებრივია გენდერული კვოტირება პირდაპირ არ უკავშირდება ამ საკითხს [ქალთა მიმართ ძალადობას] მაგრამ ეს იქნება ძალიან მნიშვნელოვანი გზავნილი საქართველოს პარლამენტის მხრიდან, პოლიტიკური ელიტის მხრიდან, რომ მთელს საზოგადოებას გავაგებინოთ, რომ ჩვენ ამ პრობლემას - ქალთა დისკრიმინაციის საკითხს ძალიან სერიოზულად ვუდგებით და მიგვაჩნია, რომ ქალთა პოლიტიკური ჩართულობის გაზრდა არის არა მთავარი, მაგრამ ერთ-ერთი მნიშვნელოვანი პასუხი იმ გამოწვევების მიმართ, რომელიც ქალთა მიმართ ძალადობის და თუნდაც ფემიციდის კუთხით საქართველოში არსებობს.“– განაცხადა ასევე დიმიტრი ცქიტიშვილმა.
განხილვა გაგრძელდება 23 მარტს და კანონპროექტის პირველი მოსმენა პარლანემტის სპიკერის, ირაკლი კობახიძესა და ვიცე სპიკერის, თამარ ჩუგოშვილის გამოსვლებით დასრულდება, რის შემდეგაც გაიმართება კენჭისყრა.
კანონპროექტის მიღების შემთხვევაში ქალთა წარმომადგენლობა 2020 წლის პარლამენტში გაიზრდება მინიმუმ 26%-მდე, ამჟამინდელი 15%-დან.
საქართველოს პარლამენტი განიხილავს 37,455 ამომრჩევლის საკანონმდებლო ინიციატივას, რომელიც საპარლამენტო და ადგილობრივი თვითმმართველობის არჩევნებზე, პარტიებსა და ბლოკებს დაავალდებულებს, რომ პარტიულ სიებში ყოველი მეორე განსხვავებული სქესის კანდიდატი წარადგინონ.
კანონპროექტი ქალთა პოლიტიკური მონაწილეობის სამუშაო ჯგუფის (Task Force) მიერ არის ინიცირებული.
|
