Category: Gender policy 
2018-03-27
„საქართველოს რესპუბლიკური პარტია“ პარლამენტში
წარმოდგენილ პოლიტიკურ პარტიებს მიმართავს.
"ქალთა კვოტირების საკითხი ბოლო წლების
საქართველოს პოლიტიკური ცხოვრების ერთ-ერთი ყველაზე აქტუალური საკითხია. ქალთა
მოძრაობის, ბევრი სხვა არასამთავრობო ორგანიზაციის, ზოგიერთი პოლიტიკური პარტიისა
და ცალკეული პოლიტიკოსების ძალისხმევით რეალისტური გახდა განსხვავებული სქესის
წარმომადგენელთა სოლიდური წარმომადგენლობის მიღწევა პარლამენტში, აჭარის უმაღლეს
საბჭოსა და საკრებულოებში.
რამდენიმე დღის წინ პარლამენტში გამართული
კენჭისყრისას მკაფიოდ გამოჩნდა, რომ პარლამენტართა სოლიდური რაოდენობა (66 ხმა)
მზადაა, მომავალ 150 მანდატიან პარლამენტში მინიმუმ 25%, ანუ 38 დეპუტატი მაინც
იყოს ქალი. პრაქტიკა ადასტურებს, რომ გარკვეული რაოდენობის მაჟორიტარულ ოლქებსაც
იგებენ ქალები.
პარტიული სიის 50/50- ზე განაწილების შემთხვევაში,
რაც შემოთავაზებული იყო ამომრჩეველთა მიერ და რასაც სულ 10 ხმა დააკლდა, მომდევნო
პარლამენტში ქალთა რაოდენობა ფაქტიურად გაორმაგდება.
კანონპროექტის ჩავარდნის შემდეგ პარლამენტის
თავმჯდომარის საჯარო დაპირება, რომ იგივე სულისკვეთების კანონპროექტი, როგორც
დროებითი ზომა, რომელიც უზრუნველყოფს პარლამენტის წევრთა მინიმუმ 25%-ის ქალებით
დაკომპლექტებას, უკვე ამ კვირაში იქნება ინიცირებული უმრავლესობის მიერ. მანვე ხაზი
გაუსვა, რომ 2024 წლიდან კი, პროპორციული სისტემით არჩეული პარლამენტის წევრთა
მინიმუმ 1/3 ანუ 50 დეპუტატი მაინც იქნება განსხვავებული სქესის წარმომადგენელი.
რესპუბლიკელები მივიჩნევთ, რომ ახლავეა შესაძლებელი
პაკეტში კანონპროექტის მიღება - როგორც შერეული სისტემით არჩეული მომდევნო, ისე
სრულად პროპორციული სისტემით არჩეული შემდგომი მოწვევის პარლამენტებისთვის.
ამასთანავე, ხაზგასმით აღვნიშნავთ, რომ ჩვენ ვსაუბრობთ არჩეული დეპუტატების
პროპორციაზე და არა, ვთქვათ, მაჟორიტარულ ოლქებში მომდევნო არჩევნებისას წარდგენილი
კანდიდატების პროპორციაზე - მაჟორიტარულ ოლქებიდან არჩეული დეპუტატების კვოტირების
სისტემით განსაზღვრა შეუძლებელია.
გენდერული კვოტირების საკითხში ჩვენ სოლიდარული ვართ
ყველა იმ პოლიტიკური ძალის და მათი წარმომადგენლისა პარლამენტში, იქნება ეს
უმრავლესობის თუ ოპოზიციის წარმომადგენელი, ვინც მზადაა, დაუჭიროს მხარი 77
პროპორციული მანდატის 50/50-ზე პრინციპით განაწილებას.
დემოკრატიულ დასავლეთში გენდერული კვოტირება
პარლამენტსა და სხვა წარმომადგენლობით ორგანოებში ნორმაა. ბევრგან საკანონმდებლო
რეგულირებაა, ზოგან კი შიდაპარტიულ კვოტირებას იყენებენ. ევროპაში დაახლოებით 200
პარტია იყენებს კვოტირებას, პრაკტიკულად ყველა წამყვანი პარტია - ზოგან 50%-იანი
კვოტაა, არის 40%-იანი და 33%-იანი სისტემებიც. კვოტირებას იყენებენ როგორც ევროპის
სახალხო პარტიაში (EPP) შემავალი მემარჯვენე თუ მემარჯვენე-ცენტრისტული დიდი და
მომცრო, სახელისუფლებო თუ ოპოზიციური პარტიები (მაგ., მერკელის მმართველი პარტია
(CDU) შიდაპარტიულ კვოტირებას იყენებს), ისე ევროპელი ლიბერალებისად და
დემოკრატების ალიანსი (ALDE), სოციალისტები, მწვანეები. ეს საყოველთაო ნორმაა არა
მარტო ევროკავშირის დამფუძნებლებსა თუ ძველ წევრებში (დასავლეთი და ჩრდილოეთ
ევროპა), არამედ პოსტ-ტოტალიტარულ ცენტრალურ და აღმოსავლეთ ევროპაშიც (ევროკავშირის
არაწევრი ბალკანური ქვეყნების ჩათვლით).
რესპუბლიკურ პარტიას გენდერულ კვოტირებაზე
(დეკლარირებული პროპორციებით) შესაძლო და სავარაუდო გადაწყვეტილება მიაჩნია
გარღვევად ქართულ რეალობაში. მოულოდნელი იყო საპარლამენტო უმცირესობის იმ დეპუტატთა
უარი კვოტირებას, რომელთაგანაც ამ იდეისადმი მხარდაჭერა ხშირად
მოგვისმენია.
რესპუბლიკურ პარტიას ქალთა კვოტირების საკითხი დიდი
ხანია მიაჩნია პოლიტიკური სპექტრის თანამშრომლობის და არა დაპირისპირების თემად.
აქედან გამომდინარე, რესპუბლიკელები ვთავაზობთ
"ევროპულ საქართველოს", რომელთანაც ბოლო ხანებში არაერთ ერთობლივ განცხადებაზე
მოგვიწერია ხელი და თემატურად ვთანამშრომლობთ განსხვავებული, ხშირად
დაპირისპირებულიც კი, პოლიტიკური ბიოგრაფიის მიუხედავად, თავისუფალი მანდატის
პრინციპით იხელმძღვანელოს განმეორებითი კენჭისყრისას და შეიტანოს წვლილი კვოტირების
დაკანონების საკითხში. ასევე, იმედი გვაქვს, რომ ნაციონალური მოძრაობის არა 2,
არამედ მეტი ხმა ექნება კვოტირებას ხელახალი კენჭისყრისას. ანალოგიური წინადადებით
მივმართავთ ასევე პატრიოტთა ალიანსის დეპუტატებსაც.
ბუნებრივია, გადამწყვეტი
პარლამენტის ხელმძღვანელობის და ქართული ოცნების დეპუტაციის ძალისხმევა იქნება,
რასაც რესპუბლიკელები ამ კონკრეტულ უმნიშვნელოვანეს საკითხში მოველით.
ყველა გამოკითხვა ადასტურებს, რომ საქართველოს
მოსახლეობის უმრავლესობა ემხრობა გენდერულ კვოტირებას. ევროპული კანონმდებლობა თუ
პრაქტიკა დიდი ხანია, უკვე ასეთია.
ნუ წავალთ საკუთარი მოქალაქეებისა და
ევროპის წინააღმდეგ!– ნათქვამია განცხადებაში.
|
