სასჯელაღსრულებისა და პრობაციის მინისტრი კახა კახიშვილი ოჯახში ძალადობის პრევენციისთვის პარლამენტს ახალი ინიციატივით მიმართავს. მინისტრმა ინიციატივის შესახებ ტელეკომპანია „იმედის“ ეთერში ისაუბრა.
კახიშვილის თქმით, ინიციატივა ციხიდან ოჯახში ძალადობისთვის მსჯავრდებულების მიერ ოჯახის წევრებთან განხორციელებული სატელეფონო ზარების მონიტორინგს ეხება.
„არამხოლოდ შემაკავებელი ორდერებია დასახვეწი, არამედ სატალეფონო ზარების საკითხიც… ხშირია შემთხვევები, როდესაც ჩვენთან წერენ განცხადებას ქალბატონები, ყოფილი და მოქმედი მეუღლეების თაობაზე, რომ რამენაირად გაკონტროლდეს ამ ადამიანების მხრიდან არასასურველი სატელეფონო ზარები. ამის დარეგულირების სამართლებრივი ბერკეტი ამ ეტაპზე არ არსებობს“, – განაცხადა კახა კახიშვილმა.
მისი თქმით, თუ ამ კუთხით სამართლებრივი მექანიზმები ამუშავდება, შესაძლებელი გახდება, არასასურველი სატელეფონო ზარების შეზღუდვა.
„ეს არის ძალიან მნიშვნელოვანი საკითხი. ჩვენი საზოგადოება უნდა იყოს დაცული, განსაკუთრებით ქალბატონები. ჩვენ ვხედავთ რამდენად მძიმე ვითარებაა ამ კუთხით. ამიტომაც ვფიქრობთ, რომ ყველა უწყება კოორდინირებულად უნდა მუშაობდეს რისკების შეფასებაზე, პრევენციაზე და რა თქმა უნდა, ეს მექანიზმები უნდა იყოს დახვეწილი, რაც ყოველ მხრივ დაეხმარება და ხელს შეუწყობს ოჯახური ძალადობის პრევენციას.“ – განაცხადა კახიშვილმა.
Using materials of the site the reference on GINSC with the indication of the author is obligatory The Portal GINSC is supported by the Kvinna til Kvinna Foundation
