ჩინურმა კომპანიებმა აიღეს ვალდებულება შეწყვიტონ სექსისტური შინაარსის ვაკანსიების გამოქვეყნება ქვეყანაში.
„მსხვილი ჩინური ტექნოლოგიური კომპანიები, როგორიცაა Baidu და Alibaba, მასიურად იყენებენ სექსისტურ განცხადებებს და რეკლამებს სამუშაოზე კანდიდატების აყვანის დროს"- აცხადებს უფლებადამცველი ორგანიზაცია Human Rights Watch (HRW).
99-გვერდიანი ანგარიშის მიხედვით, HRW-მა გაანალიზა 36,000 განცხადება ვაკანსიების შესახებ, რომელიც ჩინურმა კომპანიებმა ხუთი წლის განმავლობაში გამოაქვეყნეს. უმეტესი განცხადება მხოლოდ კაცებისთვის იყო განკუთვნილი, ზოგი კი მოითხოვდა, რომ კანდიდატ ქალებს გარკვეული სიმაღლე, წონა, გარეგნობა ან სხვა თვისებები ჰქონოდა, როც არაფერი აქვთ საერთო სამუშაო პოზიციებთან.
მაგალითად, კაცი თანამშრომლების მოზიდვის მიზნით, Alibaba-მ გამოაქვეყნა რეკლამა, რომელშიც აცხადებდა, რომ კომპანიაში მუშაობენ მხოლოდ "ლამაზი გოგოები" და "ქალღმერთები". რეკლამა ასევე შეიცავდა ქალ თანამშრომლების ფოტოსურათებს, რომლებიც მათ აღწერს არა მათი კვალიფიკაციისა ან მიღწევების მიხედვით, არამედ როგორც "ღამის სარგებელს"- აღნიშნავს Bloomberg- ი.
სკანდალის შემდეგ კომპანიების უმრავლესობამ ბოდიში მოიხადა და განაცხადა, რომ ასეთი ტიპის რეკლამები აღარ გამოქვეყნდება. Tencent- ის და Baidu- ის წარმომადგენლებმა განაცხადეს, რომ ისინი ძალიან ნანობენ ასეთი რეკლამების გამო და ამოიღეს ისინი მოხმარებიდან.
ჩინეთის კანონმდებლობით ქვეყანაში აკრძალულია ისეთი ტიპის რეკლამები, რომლიბიც სქესის ნიშნით შეიძლება დისკრიმინაციის საფუძველი გახდეს. მიუხედავად ამისა, მთავრობა არა მხოლოდ არ არეგულირებს ამ პრობლემას, არამედ 2017 წელს საჯარო სამსახურის ვაკანსიების 13% მიუთითებდა, რომ ამა თუ იმ პოზიციებზე სამსახურებს "მხოლოდ კაცები" სჭირდებოდათ ან "კაცებს უპირატესობა ჰქონდათ".
„ჩინეთის ხელისუფლება არ იყენებს კანონებს, რომელიც გრძალავს დისკრიმინაციას სამუშაო ადგილზე“- აცხადებს HRW-ის ჩინეთის ოფისის დირექტორი სოფი რიჩარდსონი და ამატებს, რომ "ქალი უფლებადამცველების დევნისა და დაპატიმრების ნაცვლად, ჩინეთის მთავრობამ უნდა დაიწყოს მათთან თანამშრომლობა შრომის ბაზარზე გენდერული დისკრიმინაციის წინააღმდეგ ბრძოლის მიმართულებით".