კატეგორია: გენდერული პოლიტიკა 2019-02-18
პირველად ლიბანსა და საერთოდ არაბულ სამყაროში, შინაგან საქმეთა მინისტრი ქალი გახდა. რაია ალ ჰასანი ერთ-ერთია იმ ოთხ ქალ მინისტრთაგან, რომლებიც ლიბანის მთავრობის ახალ შემადგენლობაში იქნებიან. ინფორმაციას Reuters-ი ავრცელებს.
"ეს ყველა ქალისთვის და საერთოდ ყველასთვის საამაყოა, ვისაც ქალის ძალის სწამს", - განაცხადა რაია ალ ჰასანიმ.
"მსოფლიოში ბევრი შს მინისტრი ქალია, რომლებმაც დაამტკიცეს, რომ ეფექტური მმართველობა შეუძლიათ. მაგრამ ლიბანისა და არაბული სამყაროსთვის ეს ახალი ფენომენია, თუმცა ვიმედოვნებ, რომ ამიერიდან ხშირად მოხდება და არ დარჩება უნიკალური", - განაცხადა რაია ალ ჰასამინ.
2009-2011 წლებში ჰასანი ფინანსთა მინისტრი იყო.
9–თვიანი კრიზისის შემდეგ ლიბანის პრემიერ–მინისტრმა, საად ჰარირიმ მინისტრთა ახალი კაბინეტის ფორმირება შეძლო. ლიბანის ახალ 30 წევრიან მთავრობის კაბინეტში კიდევ სამი ქალი მინისტრი შევიდა, რაც ასევე ისტორიული მოვლენაა.
ნადა ბუსტანი ხურიმ ენერგეტიკის მინისტრის პორთფელი მიიღო, მეი ჩიდიაკი სახელმწიფო მინისტრი ადმინისტრაციული განვითარების საკითხებში გახდა, ხოლო ვიოლეტ ჰაირალა საფადიმ ქალთა საკითხების სახელმწიფო მინისტრის პოსტი დაიკავა.
"მე ვამაყობ ლიბანელი ქალებით, ვამაყობ ოთხი ქალი მინისტრით, ვამაყობ არაბულ სამყაროში პირველი ქალი შინაგან საქმეთა მინისტრით, ვამაყობ ლიბანით", - განაცხადა პრემიერ მინისტრმა ჰარირიმ ახალი მთავრობის შემადგენლობის გამოცხადების შემდეგ.
|