Category: Gender policy 
2019-07-25
შინაგან საქმეთა სამინისტროს ადამიანის უფლებათა დაცვისა და გამოძიების ხარისხის მონიტორინგის დეპარტამენტის დირექტორად ნინო ცაციაშვილი დაინიშნა. ამ პოსტზე მან ლონდა თოლორაია შეცვალა, რომელიც პარლამენტმა სახელმწიფო ინსპექტორის თანამდებობაზე აირჩია.
შინაგან საქმეთა სამინისტროს ინფორმაციით, ნინო ცაციაშვილი 1986 წელს დაიბადა. ის პროფესიით სამართალმცოდნეა. 2017 წლის დეკემბრიდან ამ დრომდე იყო შსს-ს იურიდიული დეპარტამენტის დირექტორის მოადგილე. 2009 წლიდან ცაციაშვილი პროკურატურის სტრუქტურაში მუშაობდა, მათ შორის, 2014-2015 წლებში იყო მთავარი პროკურატურის საპროკურორო საქმიანობაზე ზედამხედველობისა და სტრატეგიული განვითარების დეპარტამენტის ანალიტიკური სამმართველოს პროკურორი.
შსს-ს ადამიანის უფლებათა დაცვის დეპარტამენტის ყოფილი დირექტორი, ლონდა თოლორაია პარლამენტმა სახელმწიფო ინსპექტორის თანამდებობაზე 11 ივნისს აირჩია. ლონდა თოლორაიას კანდიდატურას მხარი 82-მა დეპუტატმა დაუჭირა, 21 კი წინააღმდეგი იყო.
ადამიანის უფლებათა დაცვის დეპარტამენტი 2018 წლის 11 იანვარს შეიქმნა, რომელიც უზრუნველყოფს დროულ რეაგირებასა და მიმდინარე გამოძიების ეფექტიანობას, შემდეგ დანაშაულებზე: ოჯახში ძალადობა, ქალთა მიმართ ძალადობა, დისკრიმინაციული ნიშნით ჩადენილი დანაშაული, სიძულვილით მოტივირებული დანაშაული, ტრეფიკინგი, არასრულწლოვანთა მიერ და მათ მიმართ ჩადენილი დანაშაული.
|
