Category: Gender based violence 
2019-09-27
2016 წელს მოკლული პაკისტანელი მოდელის ქანდილ ბალოჩის ძმას ვასიმ ბალოჩს სამუდამო პატიმრობა მიესაჯა. ინფორმაციას ამის შესახებ BBC ავრცელებს.
ვასიმმა აღიარა, რომ 2016 წლის 26 ივლისს საკუთარი და დაახრჩო, ვინაიდან ის მთელს ოჯახს "არცხვენდა". კერძოდ, ის სოციალურ ქსელებში ფოტოებს აქვეყნებდა. ვასიმის გარდა განაჩენი გამოუტანეს კიდევ 6 ადამიანს, მათ შორის რელიგიურ მოღვაწე მუფთი აბდულ ქავის. ბალოჩის ოჯახი მკვლელობაში სწორედ აბდულ ქავის ადანაშაულებდა, რომელმაც სოციალურ ქსელებში გამოქვეყნებული ფოტოების გამო ქანდილ ბალოჩი გარდაცვალებამდე ერთი თვით ადრე გააკრიტიკა.
ქანდილ ბალოჩი პაკისტანის სოციალური მედიის პირველი ვარსკვლავი იყო. მას სოციალურ ქსელებში ასი ათასობით გამომწერი ჰყავად, რის გამოც მას ხშირად „პაკისტანელ კიმ კარდაშიანს“ უწოდებდნენ. სოციალურ ქსელებში ბალოჩი საკუთარი ცეკვისა და სიმღერის ამსახველ ვიდეოს დებდა, რითაც კონსერვატიულ საზოგადოებაში არსებულ მკაცრ ტაბუს არღვევდა.
პოპულარობის მოპოვების შემდეგ მან სოციალურ ქსელებში სხვადასხვა სახის პროდუქციის რეკლამირება დაიწყო. 2015 წელს ქანდილ ბალოჩი მოხვდა 10 ადამიანს შორის, რომლებსაც პაკისტანის ტერიტორიაზე Google-ში ყველაზე ხშირად ეძებდნენ.
აბდულ ქავიმ ბალოჩი შეხვედრაზე მიიწვია, მოდელმა კი მუფტისთან შეხვედრაზე სელფი გადაიღო და სოციალურ ქსელებში ატვირთა. რამდენიმე დღეში ის საკუთარ საწოლში მოკლული ნახეს.
|
