Категория: Гендер в мире 
2019-11-29
სუდანის გარდამავალმა ხელისუფლებამ გააუქმა კანონი საზოგადოებრივი წესრიგის შესახებ, რომელიც არეგულირებდა ქალთა ქცევას ექს-პრეზიდენტ ომარ ალ-ბაშირის დროს. როგორც Reuters-ი იუწყება, ამის შესახებ ქვეყნის იუსტიციის მინისტრმა ნასრედინ აბდელბარიმ განაცხადა.
მთავრობამ ეს ნაბიჯი საპროტესტო მოძრაობის მოთხოვნების საპასუხოდ გადადგა, რომელშიც აქტიური მონაწილეობა ქალებმა მიიღეს.
გაუქმდა, ასევე, სისხლის სამართლის კოდექსის ნორმები „ამორალური ქმედებების“ შესახებ, რომლებიც ქალებს ავალდებულებდა, ჩაეცვათ ისლამური და კულტურული სტანდარტების შესაბამისად, მათ შორის - ეტარებინათ თავსაბურავი. კოდექსის მიხედვით, ქალებისთვის დაწესებული იყო გადაადგილების, მუშაობისა და განათლების მიღების შეზღუდვები.
სუდანში ქალების გამათრახება დასჯის საკმაოდ გავრცელებული მეთოდი იყო. ფიზიკურ დასჯას შარიათის კანონები ითვალისწინებდა და ეს წესები სუდანის სასამართლო სისტემაში 1983 წელს შეიტანეს. ქალის გამათრახების მიზეზი კი, შესაძლოა, შარვალის ტარება ან მამაკაცთან ერთად გაისეირნებაც ყოფილიყო.
სუდანში ქალები ფართომასშტაბიან დისკრიმინაციას აწყდებიან. ისლამური კანონები კრძალავს თანაბარ უფლებებს ქალებისთვის ისეთ საკითხებში, როგორებიცაა ქორწინება, მემკვიდრეობა და განქორწინება. ტრადიციული და რელიგიური კანონებით, ქალებს ეზღუდებათ ქონების უფლება. მრუშობაში ბრალდებული ქალები, შესაძლოა, სიკვდილით დასაჯონ. მამაკაცი მეურვის გარეშე ქალებს არ აქვთ უფლება იმოგზაურონ ან აიღონ საიდენტიფიკაციო დოკუმენტები. აღნიშნული აკრძალვა მიმართულია ჟურნალისტებისა და ქალი აქტივისტების წინააღმდეგ. სუდანმა ვერ შეძლო შესაბამისი ნაბიჯები გადაედგა ადამიანებით ვაჭრობისა და ქალთა და გოგონათა სექსტრეფიკინგის შემცირებისთვის. მუსლიმ ქალს ასევე, აკრძალული აქვს კანონიერად გაჰყვეს ცოლად არამუსლიმ კაცს.
შეგახსენებთ, რომ 2019 წლის 11 აპრილს სუდანში სამხედრო გადატრიალება მოხდა, რომლის მიზანი პრეზიდენტის, ომა ალ-ბაშირის ჩამოგდება იყო. ძალაუფლება ხელში სამხედრო საბჭომ აიღო.
პრეზიდენტის ჩამოგდებას ხანგრძლივი საპროტესტო აქციები უძღოდა წინ. მოქალაქეები თავდაპირველად პურის გაძვირებას აპროტესტებდნენ, შემდეგ კი პრეზიდენტ ომარ ალ-ბაშირის გადადგომა მოითხოვეს. აქციების დარბევას ათეულობით ადამიანი ემსხვერპლა, რასაც მოჰყვა კიდეც ალ-ბაშირის ჩამოგდება.
|
