კატეგორია: გენდერული ძალადობა 
2020-02-04
გამოცემა The New York Times-მა საკუთარ გამოძიებაზე დაყრდნობით გამოაქვეყნა სტატია „ანგელოზები ჯოჯოხეთში: მიზოგინიის კულტურა Victoria's Secret-ში“ (‘Angels’ in Hell: The Culture of Misogyny Inside Victoria’s Secret) მიზოგინიის, შევიწროვებისა და არასწორი დამოკიდებულების შესახებ, რომელსაც მრავალი წლის განმავლობაში განიცდიდნენ Victoria's Secret-ის მოდელები და თანამშრომლები მენეჯერულ თანამდებობებზე მყოფი მამაკაცების მხრიდან.
ძირითადი პრეტენზიები ყოფილ პრეზიდენტს და მთავარ მარკეტოლოგს, 71 წლის ედ რაზეკს ეხება. კომპანიის 30 თანამშრომლის გამოკითხვით გაირკვა, რომ ის მუდმივად ამცირებდა მოდელებს და ხშირად სექსუალურად ავიწროებდა. გოგონები, რომლებიც ასეთ დამოკიდებულებას აპროტესტებდნენ მალე სამსახურის გარეშე რჩებოდნენ.
ედ რეზეკმა კომპანია გასული წლის ზაფხულში დატოვა. სწორედ მან მოიფიქრა ბრენდის ყოველწლიური შოუ, რომელიც საკულტო წარმოდგენად იქცა.
მოდელი ენდი მუიზი ერთ–ერთია, ვინც აღიარა, რომ რაზეკის მსხვერპლი გახდა. გოგონა ამტკიცებს, რომ ტოპ მენეჯერი ნებისმიერ ხელსაყრელ შემთხვევას იყენებდა და სექსუალურად ავიწროებდა, სექსზე უარის შემდეგ კი ბრენდის ახალ ჩვენებებზე მოდელად აღარ იწვევდა.
როგორც მოსალოდნელი იყო, Victoria’s Secret–ის ექს პრეზიდენტმა ბრალდებები უარყო.
„ამ რეპორტაჟში მოყვანილი ბრალდებები სრულიად არ შეესაბამება სინამდვილეს, არასწორად არის ინტერპრეტირებული ან კონტექსტიდან ამოგლეჯილი. სიამოვნებით ვთანამშრომლობდი მსოფლიო კლასის უამრავ მოდელთან და ვამაყობ ჩვენს შორის არსებული ურთიერთპატივისცემით“ – ასეთი წერილი გაუგზავნა ედმა გამოცემას ელექტრონული ფოსტით.
კომპანიის იმიჯი შარშან დაზიანდა, როცა აღმოჩნდა, რომ Victoria’s Secret–ის ფინანსისტი ჯეფრი ეპშტეინი მოდელებს თავის კასტინგზე ეპატიჟებოდა და სულ მცირე ორჯერ, ასეთი წვეულებები გაუპატიურებით დასრულდა. 2019 წლის ივნისში ეპშტეინი დააპატიმრეს არასრულწლოვნების სექსუალურ მონობაში გაყიდვის ბრალდებით. მალე ფინანსისტი ციხის საკანში გარდაცვლილი იპოვეს.
გამოცემის თანახმად, მოდელებმა შევიწროებაში ასევე Victoria's Secret- ის ფოტოგრაფი, რასელ ჯეიმსი დაადანაშაულეს, რომელიც მათ სრულიად შიშველი ფოტოების გადაღებას სთავაზობდა.
|
