ესპანეთის პარლამენტმა მხარი დაუჭირა კანონპროექტს სექსუალური ძალადობის შესახებ, რომლის თანახმად სექსუალური კავშირი თანხმობის გარეშე, გაუპატიურებად ჩაითვლება.
კანონპროექტი, რომელიც ესპანეთის პარლამენტში თვეების განმავლობაში განიხილებოდა, ასევე მიზნად ისახავს სპეციალიზირებული სასამართლოებისა და სექსუალური ძალადობის მსხვერპლთა მკურნალობის ცენტრების შექმნას. კანონის თანახმად სამუშაო ადგილზე სექსუალური შევიწროება ორ წლამდე პატიმრობით დაისჯება.
თანხმობის გარეშე სქესობრივი კავშირის გამო დამნაშავეებს 10-დან-15 წლამდე პატიმრობა ემუქრებათ, უფრო მკაცრად დაისჯებიან ქმრები და დაზარალებულების ყოფილი პარტნიორები.
ახალ კანონს ეწოდება ”მხოლოდ დიახ ნიშნავს დიახს” და ის ასახავს სტამბოლის კონვენციის დებულებას, რომლის მიხედვით, პირმა ვერბალურად ან ფიზიკურად ღია თანხმობა უნდა გამოხატოს სექსუალური კავშირის მიმართ.
ევროპის ქვეყნების უმეტესობას ჯერაც არ აქვს მიღებული მსგავსი კანონი. Amnesty International-ის თანახმად, კანონები, რომლებშიც თანხმობის გარეშე სექსი გაუპატიურებად ითვლება, ევროკავშირის 31 ქვეყნიდან 9 ქვეყანაში მოქმედებს, მათ შორის დიდ ბრიტანეთში, ირლანდიაში, ბელგიაში, ლუქსემბურგში, გერმანიასა და კვიპროსში. ამჟამად, გაუპატიურების განმარტების გადახედვას დანიის კანონმდებლობაშიც აპირებენ.
ქართული კანონმდებლობის მიხედვით, გაუპატიურებად ითვლება მხოლოდ ის ქმედება, რომელიც ჩადენილია ძალადობითა და ძალადობის მუქარით, მაშინ, როცა უფლებადამცველების თქმით, საერთაშორისო სტანდარტები, მათ შორის სტამბოლის კონვენცია, რომლის რატიფიცირებაც საქართველომ 2017 წელს მოახდინა, სახელმწიფოებს აძლევს რეკომენდაციას, რომ გაუპატიურებად უნდა ჩაითვალოს სექსუალური კავშირი თანხმობის გარეშე, ჩადენილი ძალადობისა და მუქარის გარეშე.
