Категория: Гендерное насилие 
2020-03-11
მექსიკაში გახშირებული ქალთა მიმართ ძალადობისა და მკვლელობების ფაქტები გააპროტესტეს. ამ დღეს აქტივისტებმა ქალებს გაფიცვისკენ მოუწოდეს.
„არც ერთი ქალი სკოლასა და ოფისში, არც ერთი ქალი რესტორანსა და მაღაზიაში, არც ერთი ქალი საზოგადოებრივ ტრანსპორტში, მანქანებსა და გზებზე – ქვეყანა ერთი დღით ქალების გარეშე!“ – ასეთი მოწოდებით გამოვიდნენ აქციის ორგანიზატორები, მექსიკელი ფემინისტური მოძრაობის Las Brujas del Mar-ის (ზღვის ჯადოქრები) წევრები.
სხვადასხვა სოციალური კლასების, ეთნოსების, პოლიტიკური ძალებისა და მოძრაობების მხარდაჭერამ გააჩინა იმედი, რომ ეს პროტესტი იქნება არა ტრაფარეტული, არამედ ნამდვილი წყალგამყოფი მექსიკელი ქალების ცხოვრებაში.
გამოცემა El Universal- ის თანახმად, დაახლოებით 500 ათასმა ქალმა უარი თქვა სამუშაოზე, უნივერსიტეტებში და სკოლებში მოსვლაზე, ასევე უარი ითქვა საზოგადოებრივი ტრანსპორტით სარგებლობაზე. მექსიკის სენატში დასაქმებული ქალების 42% და დეპუტატთა პალატის 3800 თანამშრომელმა ქალმა უარი თქვა სამუშა ადგილას მისვლაზე.
აქციის წინა დღეს, ქალთა საერთაშორისო დღესთან დაკავშირებით, მექსიკაში, მრავალათასიანი მსვლელობა გაიმართა, რომლის დროსაც მომიტინგეებსა და პოლიციის შორის შეტაკებები მოხდა.
პროტესტის ერთ-ერთმა ორგანიზატორმა, განაცხადა, რომ აქციის მიზანი იყო სისტემის დასჯა: ”ჩვენ გვინდოდა გვეჩვენებინა ძალადობა, რომელსაც ქალები განიცდიან ჩვენი ქვეყნის ყველა კუთხეში.”
საიტ statista.com-ის ინფორმაციით, გასულ წელს მექსიკაში ფემიციდის 976 შემთხვევა აღინიშნა.
|
