კატეგორია: მოვლენები 
2020-04-02
კორონავირუსით COVID -19 ინფიცირებული მსუბუქი სიმპტომების პაციენტები მკურნალობას ოჯახის ექიმის ზედამხედველობის ქვეშ შინ გაივლიან. ჰოსპიტალში მათ მდგომარეობის გართულების შემთხვევაში გადაიყვანენ. ამის შესახებ ჯანდაცვის მინისტრმა ეკატერინე ტიკარაძემ განაცხადა საკოორდინაციო საბჭოს სხდომის დასრულების შემდეგ გამართულ ბრიფინგზე.
მისი სიტყვებით, იანვარში ჩინელი ექიმებისგან მიიღეს ინფორმაცია, რომ პაციენტთა 80%-ს შემთხვევაში დაავადება უსიმპტომოდ მიმდინარეობს, ამ ინფორმაციაზე დაყრდნობით შეიმუშავეს გეგმა რომლის თანახმადაც მსუბუქი პაცინტების მოვლა ოჯახის ექიმის მეთვალყურეობით განხორციელდეს.
„თუ ადამიანს უფიქსირდება გარკვეული სიმპტომი ექიმი-სპეციალისტი აძლევს მას რეკომენდაციას, რომ დაყოვნდეს სახლში და ანამნეზის ზუსტი ნაკრების შემდეგ მიიღება გადაწყვეტილება, უნდა მოხდეს ამ პაციენტის სტაციონარში გადაყვანა თუ შემდგომი მონიტორინგი ბინაზე. ეს არის ძირითადი სქემა რითაც ჩვენ ვაპირებთ მოქმედებას, ხოლო პაციენტის სიმპტომების გართულების შემთხვევაში, რა თქმა უნდა, შესაბამისი აღჭურვილობით და ტრანსპორტით პაციენტი გადაყვანილი იქნება ჰოსპიტალში, რაც მოხდება ექიმთან კონსულტაციისა და კოორდინაციის შემდეგ“,- განაცხადა ეკატერინე ტიკარაძემ.
თუმცა, მას არ დაიკონკრეტებია, როდიდან აპირებს ჯანდაცვის სისტემა ამ სქემით მოქმედებას.
2 აპრილის 14:30 საათის მდგომარეობით, საქართველოში ლაბორატორიულად დადასტურებულია სულ 130 შემთხვევა. მათგან 2 შემთხვევაში ინფიცირებულნი იყვნენ ავსტრიის მოქალაქეები, რომლებიც სამშობლოში დაბრუნდნენ. უკვე გამოჯანმრთელებულია 26 ადამიანი. შესაბამისად, ამ დროისთვის საქართველოში ლაბორატორიულად დადასტურებული 102 აქტიური შემთხვევაა. |
