Category: Announcements 
2018-02-22
“ქალთა ფონდი საქართველოში“ იწყებს კამპანიას “თავშესაფარს მიღმა”, რომელიც მიზნად ისახავს ძალადობის მსხვერპლთა და დედათა და ბავშვთა თავშესაფარში დროებით მცხოვრებ ქალებს ხელი შეუწყოს დასაქმებასა და ფინანსურ გაძლიერებაში, რათა მათ აღარ მოუწიოთ ძალადობრივ გარემოში დაბრუნება.
შეგროვილი თანხით თავშესაფრის სამზარეულო აღიჭურვება საჭირო პროფესიული ტექნიკით, რაც იქ მცხოვრებ ქალებს საშუალებას მისცემს, გამოცდილი შეფ-მზარეულის ხელმძღვანელობით გაიარონ მზარეულის კურსი, რაც როგორც თავშესაფარში, ასევე თავშესაფრის მიღმა მათ დასაქმებაში დაეხმარება.
საჭირო თანხის შეგროვების შემდეგ თავშესაფარში ამუშავდება სოციალური საწარმო - მზა კერძების მიწოდების სერვისი, სადაც დასაქმდებიან ცენტრში მცხოვრები ქალები. გარდა იმისა, რომ ისინი შეიძენენ პროფესიულ გამოცდილებას, თავშესაფარი უზრუნველყოფილი იქნება დამატებითი შემოსავლით.
იდეის განხორციელებისთვის საჭირო 50 000 ლარის შესაგროვებლად „ქალთა ფონდი საქართველოში“ თიბისი გალერეაში 1 მარტს გამართავს გამოფენა-გაყიდვას, ხოლო 2 მარტს აუქციონს, რისთვისაც 70-ზე მეტმა ხელოვანმა სრულიად უანგაროდ უკვე შემოგვწირა საკუთარი ნამუშევრები.
ნამუშევრების სანახავად და მათზე დეტალური ინფორმაციისთვის ეწვიეთ ბმულებს:
გამოფენა - გაყიდვაზე წარსადგენი ნამუშევრები - http://bit.ly/2EpFwxU
აუქციონზე წარსადგენი ნამუშევრები -
http://bit.ly/2ClmN0k
გამოფენა-გაყიდვაში მონაწილეობის გარდა, თავშესაფარში მცხოვრებ ქალთა მხარდაჭერა ნებისმიერ მსურველს შეუძლია თანხის სპეციალურ ანგარიშზე გადარიცხვით - GE73TB7505136080100006.
ძალადობისგან დაცვის ეროვნული ქსელი ქალთა მიმართ ძალადობის და ოჯახში ძალადობის საკითხებზე 2003 წლიდან მუშაობს. მას შემდეგ ორგანიზაციას აქვს იურიდიული კონსულტაციის, ფსიქო-სოციალური რეაბილიტაციის და თავშესაფრის სერვისები.
თავშესაფარში ამჟამად 13 ბავშვი და 7 ქალი ცხოვრობს. 2009 წლის მონაცემებით, საქართველოში 11 დაქორწინებული ან ხანგრძლივ ურთიერთობაში მყოფი ქალიდან 1 ქალს სექსუალური და ფიზიკური ძალადობის გამოცდილება აქვს, ხოლო სამი ქალიდან ერთს ძალადობის ერთი ფორმა მაინც გამოუცდია საკუთარ თავზე. |
